Hreyfing sem byrjar á samtali – markþjálfun fyrir hreyfingu og vellíðan

Margir sem ég hitti segja mér það sama: „Ég veit að ég ætti að fara að hreyfa mig, en ég bara… kem mér ekki í gang.“ Þeirra "ég veit" er sterkt, en "ég bara" er oft þungt og þreytandi.

Þess vegna ákvað ég að þróa nálgun þar sem hreyfingin byrjar ekki á æfingaprógrammi eða skráningu í ræktina, heldur á samtali.

Af hverju vilt þú hreyfa þig?

Við byrjum ekki á því hvað þú ætlar að gera. Við byrjum á því af hverju. Hvað er það sem kallar á hreyfingu í þínu lífi? Viltu ná andlegu jafnvægi? Finna styrk? Finna gleðina aftur? Losna við höfuðverkina sem koma eftir langan dag við skrifborðið?

Markþjálfunin hjálpar þér að tengjast þessari rót – því þegar þú tengir hreyfingu við eitthvað sem raunverulega skiptir þig máli, þá verða skrefin léttari og markvissari.

Hvernig virkar þetta?

Þetta er samblanda af hreyfiráðgjöf og markþjálfun. Þú færð:

• Upphaflegt markþjálfunarsamtal (55 mín) – við speglum saman hvar þú ert og hvert þú vilt fara.

• Dagleg eftirfylgni – stutt skilaboð sem halda tengingunni og stuðningnum gangandi.

• Vikulegt markþjálfunarsamtal (30 til 50 mín) – við vinnum með áskoranir, hreyfimynstur, og næstu skref.

Hvort sem þú vilt fara að ganga, taka þátt í hlaupum, byrja að æfa heima eða einfaldlega komast út í ferskt loft – þá erum við að vinna með þína vegferð, ekki forskrift annarra.

Fyrir hvern er þetta?

• Þig sem vilt komast í hreyfingu en finnur ekki byrjunarpunktinn

• Þig sem vilt samræma líkama og hug

• Þig sem vilt láta þér líða betur í eigin skinni – bæði líkamlega og andlega

• Þig sem ert að vinna gegn streitu, kulnun eða vanlíðan

Hreyfing er ekki refsing – hún er gjöf

Við breytum ekki öllu í einu. En með einu samtali geturðu byrjað að byggja hreyfingu inn í lífið á þínum eigin forsendum.

Viltu byrja?

Sendu mér línu á brb@brbadventure.com og við finnum tíma fyrir fyrsta samtalið.

Það kostar ekkert – og það gæti verið fyrsta skrefið að einhverju nýju.

Þrjár spurningar til umhugsunar:

1. Hvað kemur upp í huga þér þegar þú hugsar „ég ætti að fara að hreyfa mig“?

2. Hver hefur hreyfing verið í þínu lífi hingað til – vinur eða óvinur?

3. Hvað myndi breytast ef þú tengdir hreyfingu við vellíðan í stað afkasta?